Shooting-Ideen

Im Räga durch d'Stadt

D’Idee wär zum im Kleid und mitemana Schirm (cool wär auno barfuass) durch da Räga in dr Stadt laufa und trotz Räga freudig und beschwingt sie und dr Schirm meh als Accessoir z’brucha, anstatt als Rägaschutz. Natürlich wird ma denn nass, aber gseht sicher no cool us.

Obig ufemana Bänkli

Do wärs cool zum am Obig, wenns scho tunkel isch, in dr Stadt uf as Bänkli z’sitza und z.Bsp. öppis läsa oder so :-)) und vu da Stadtliachter (Verkehr, Liachtsignal) belüchtet werda. I würd no kli mit farbiga Blitz nochhelfa. Ma könnt a cools Outfit, ev. an Huat und ev. sogär a Sunnabrilla mitneh.

Silhouetta- und Schattabilder

Bi dära Idee würd z’Modell hinteramana dünna Tuach sie und dr Blitz würd Schatta uf z’Tuach wörfa und uf dr Foti würd ma nu dr Schatta gseh. As wär eher körperbetont, weil ma würd nu d’Silhouetta gseh. I tenka, as könnt spannend sie, aber ma würdi nit gseh, wer hinteram Tuach isch.

I han mol so öppis ähnlichs gmacht, ohni Tuach, woma nu d’Silhouetta gseht, ganz tünn und nit erkennt, wer ufem Bild isch. Mitemana Tuach wirds unschärfer sie.

Im Herbstlaub

Falls es schöni Blätterhüfa hät, wärs no cool, zum a Herbstinszeniarig z’macha. Cool wär, d’Blätter schön azordna, a cools Kleid alegga und denn uf d’Blätter ligga und d’Hoor schön ussanand stricha.

Und als witeri Bilder wär cool, wenns sona Steitstäga oder as Müürli mit Gländ hetti und viel Blätter am Boda und denn ufem Müürli stoh oder ans Gländer lehna.

Herbst usgschossena Rohrkolba

Typischi eher küahli Herbstbilder zwischa usgschossenem Rohrkolba oder gelblichem Schilf.

Seifablöterli-Shooting

À la Heidi

Wasserfall / Wasserfall im Räga

D’Idee wär zum am oder gar im Wasserfall z’sie. Bi dr Täss häts a Wasserfall, wo nit so hoch isch und darum au nit so weh macht. Ideal wär entweder am Morga z’goh oder wenns regnet. An schöna warma Nommitäg häts z’viel Lüt.

A Varianta wär zum z’Wasser ganz weich flüssa z’loh.

Gobo

A «Skyline» würd durch an Blitz uf da schwarz Hintergrund vum Studio projiziart werda und z’Modell wär kleidet, wia wenn sie in dr Stadt in Usgang goht, z.Bsp. as Kleid oder a cools Outfit. D’Bilder wären farbig, aber eher tunkel.

Streifliacht über da Körper

Das wären Schwarzwiss-Fotis im Studio, mit Gegaliacht, wo dr Blitz grad so knapp über da Körper streift und ma denn knapp d’Kontura gseht.

Waldliachtig

Imena dichta Wald binera Liachti wiana Fee sie imena wissa Kleid und barfuass. Stehend in dr Helligkeit vu dr Liachtig oder sitzen mitem Kleid rep. Rock usbreitet (ideal wär a Tellerrock).

Beauty-Shooting

Schöni Frisura/Zöpfli/…, cooli Outfits, verschiedeni Kombinationa. Das kann guat im Studio oder au dussa sie.

Flüssli unter Gebüsch

Bi dära Idee würdma zumena klina Flüssli mit eher weniger Wasser goh und zwar an a Stell, wo z’Flüssli mit Gebüsch kli verdeckt isch. Döt könnti ma a kli «Gheimnisvolls» Shooting macha.

Herbst Waldrand gega Sunna

Warmi Herbstbilder am Waldrand gega Sunna, knülend inera Lücka, so dass d’Sunna vu hinna konnt resp. a Gegaliacht-Foti wird.

Studio low-key schwarz-wiss unter Wasser/Duschi

Do gengs drum zum d’Wassertröpfli, wemma unter Wasser stoht, so schnell z’fotografiara, dass ma dia einzelna Tröpfli vum Körper sprütza gseht. D’Bilder wären eher schwarz-wiss und eher tunkel.